العاميّه والفـُصْحَىَ

العاميه
والفـُصْحَىَ

يااهل البلاغه ليه بتتعاركـُم ...................

................... الشِعر فـُصحَى واللا عاميَّه

الفصحى سِحْر ف كل اشعاركم ..............

...................... والدارجه لهـْجه للمِلاغِيَّه

بيجيلها برضوُ وحيَّها ويـِلـْهـِم ................

...................... شاعر بكام موال وأغنيَّه

شوف الأغاني كتيره ليه واحْكـُم .............

............. علشان بسيطه وسهله ف المعْنىَ

ليه خوفكو زايد وانشغل بالكم ................

................ خايفين لتِبقـَىَ الفـُصحَى عاميه

ـــــــــــــــــــ

الفـُصْحَى دايما ًًللأبد باقيَّه ....................

................... نازله هديّه بأمر م الرحمن

لغة الحلاوه بحُسنها وراقيّه .................

................. مِتخـَلـِّده بحروفها في القرآن

لغة البلاغه المُبْدِّعه الحيَّه ...................

.................. لغة التاريخ والعِلم والإيمان

ليه نخاف عليها ونِشتِكي وهِيَّه .............

.............. غاليه وعاليه وشامخه كالمدنه

ما ف يوم تكون في الضِل منـْسِيَّه .........

............ وهتِبقىَ دايمًا راسخه كالبُنـْيَّان

ـــــــــــــــــــ

أمّا اللغه العاميه والدارجه ..................

............... لغة الحوار والعِيشه بين الناس

الكِلمه فيها لا بتِتهجَّىَ ......................

.......... ولا تِنطِبع ف كتاب ولا ف كرّاس

م الوِّدْن تجري تخـُّش ع المُهجه ...........

................. وتهز فيها الوجد والإحساس

نسمعها غنوَّه نحِس بالبهجه ................

................ يا جمالها لما بشِعْر تِتغنـَّى

فيها الطرب واللحن في اللهجَه ............

........... يدخل ينعنش ف الفؤاد والراس

ــــــــــــــــــ

ما ف يوم هتيجي الفـُصْحَى تتأثر ..........

.......... والدارجه مش ممكن عليها تجور

ومهيش منافسه ومين تكون أجدر ...........

........... أو مين تكون شيء للبشر محظور

ولكل واحده بشكلها تِقدر .....................

................ تنشـُر بقنديلها الضيا والنور

يبقى احنا ليه نزعل ونتكدَّر .................

............... نخلق حكايه ومشكله ومِحنه

لو كل واحد فينا يتشطـَّر ...................

................ يجعل بإبداعُه الجميع مبهور

**********

الاخ المبدع الكبير اشكرك على هذا الابداع الوفير ماشاء الله
نصوص متميزة ذات قضية انسانية
بارك الله فيك وفي مجهودك

مرة اخرى اشكرك على الحكمة
بارك الله فيك واصل معنا

الحلاج كتب:: مرة اخرى اشكرك على الحكمة
بارك الله فيك واصل معنا

انا الذي اشكرك اخي الحلاج لاهتمامك وتشريفك لي
الف الف شكر

سميح القاسم كتب:: الاخ المبدع الكبير اشكرك على هذا الابداع الوفير ماشاء الله
نصوص متميزة ذات قضية انسانية
بارك الله فيك وفي مجهودك

شكرا جزيلا اخي الشاعر سميح القاسم
اسعدني تعقيبك الكريم
بارك الله فيك وارضاك
مع التحية والتقدير

العاميّه والفـُصْحَىَ

العاميّه والفـُصْحَىَ :: تعاليق

العاميّه والفـُصْحَىَ