يا رايح عند بيت الله

يا رايح عند بيت الله

يا رايح عند بيت الله .............. تزور الكعبه والحرمين

ترُّد الأبلا يا ولداه ............. حقوق الناس وتوْفِي الدين

وبرضه الظلم ما تِنساه ......... لو انت كنت م الظالمين

وحق المظلومين لو تاه ........... ترُدُّه حتى لو كان فين

ـــــــــــــــــــــ

وإن كانت عليك أعمال ............ بتاكل فيها قوت القوم

وكنت تغِش في المكيال .... وكان يومها الضمير معدوم

فتوب أول ورُد المال ......... وإوعىَ يروح عليك النوم

ولازم تبقى راضي البال .... مِسافر والإيدين طاهرين

ــــــــــــــــــــ

وإنتي ياللي ناويه تروح ........ تِصالحي الأبلا كل الناس

وإوعي تِبقي زي اللوح ........ وخللي في الشعور إحساس

تسيبي ليه وراكي جروح .... عشان جبتي في سيرة الناس

وباب التوبه فوق مفتوح ........ بشرط تكوني م الصادقين

ــــــــــــــــــــــ

وبعد ما تبدأ الإحرام ............. وتِمشي م المطار وتطير

فإوعَك تِرتِكب آثام ............. تسيء للناس وتئذي الغير

وطنش لو سِمِعت كلام .......... مالوش معنى ولا تفسير

وإوعى تقول حلال وحرام ........ وتِفتي في أمور الدين

ـــــــــــــــــــــ

عشان الفتوى ليها ناس ........... ضليعه وكلهم جامدين

دروس الفِقه جوا الراس ............ بتدرسها بقالها سنين

متبقاش انت والوسواس .. على الناس اللي مش عارفين

ومش لازم تكون ترباس ... مُصِّر تقول غلط في الدين

ــــــــــــــــــــــ

عشان حجك يظل سليم ...... فحاول تِعتِكِف في البيت

وصلي وخلص التسليم ........... وصلي تاني لو حبيت

ودايما تبقى هادي حليم .. ما تدخلشي ف كلام وحديت

وإدعي كتير لرب كريم ......... بقلب نضيف بكل يقين

ـــــــــــــــــــــ

ولما تروح منى وعرفات ........... يكون قلبك مع مولاه

وقضـِّي الوقت في الدعوات .... وسيب كل القديم وانساه

وإوعىَ تِمنع الدمعات ............ مدام نازله في حب الله

يا بخت اللي السعادي يموت....... ونازله دِمعته م العين

ــــــــــــــــــــــ

حتبقى الناس في يوم الحشر .... تشوفهم زي يوم عرفات

ولكن شيء يفوق الحصر ........... وكلـُّه مِنشِغِل بالذات

بيتمنى يعود العُمْر ........... عشان يرجع يجيب حسنات

ولكن شاء ولى الأمر ....... يسِدُّوا الدين في يوم الدين

ـــــــــــــــــــــــ

ومن عرفات يفيض الكل ...... وفيها إيمان وعزم شديد

قلوب بيضا وزي الفل .... ( نيو لوك ) بالطهاره جديد

ونور الفجر ييجي يهل ........... عشان يبدأ معاه العيد

وكل الدنيا تِصحَىَ تسِل .......... كذالِك تِدبح الخرفان

ـــــــــــــــــــــــ

يفيض الجمع من عرفات .. عشان يرمي على الشيطان

وتبقى رمية الجمَرات .......... على إبليس ونسله كمان

ولكِن يبتدي ستات ................... ورجاله بعقل جنان

يسِّبوا ويشتِموا بلـُغات ......... وهمَّ بيرجموا الملاعين

ــــــــــــــــــــــــ

يا ناس فوقم دا مش مطلوب . نحدِّف أى شيء وخلاص

شباشِب أو حجاره وطوب ........ وقال بيأدِّبوا الخناس

يا ناس الرجم شيء محسوب . مناسك حج مش تار خاص

وإقروا والأساس موجود .......... مُسجل في كِتاب الدين

ـــــــــــــــــــــــ

وبعد ما يرجع الحجاج ....... بلادهم م الذنوب طاهرين

يا ريتهم يطعِموا المِحتاج ......... ويبقوا للهدى ساعيين

ويبقى الخير في راسهم تاج ....... بيسعِد بالأمل ملايين

ما يبنوش كل يوم ف براج .... وغيرهم يبقوا مِنعِدمين

**********

شكرا اخي تبار الله حج كل من حصل لى فرصة يارة مقام النبي وطوبى له

هشام مزيان كتب:: شكرا اخي تبار الله حج كل من حصل لى فرصة يارة مقام النبي وطوبى له

شكرا اخي هشام
وكل سنه وانت طيب
وربنا يكتبها لك ان شاء الله
تحياتي

وإن كانت عليك أعمال ............ بتاكل فيها قوت القوم

وكنت تغِش في المكيال .... وكان يومها الضمير معدوم

فتوب أول ورُد المال ......... وإوعىَ يروح عليك النوم

ولازم تبقى راضي البال .... مِسافر والإيدين طاهرين

اخى وعزيزى مسعد النحلة شكرا لك على ما قدمت وكل عام وانت بخير عيد طيب مبارك نطلب من الله ان يعيده علينا جميعا بخير ويمن وبركات

سليمان محمد شاويش كتب:: وإن كانت عليك أعمال ............ بتاكل فيها قوت القوم

وكنت تغِش في المكيال .... وكان يومها الضمير معدوم

فتوب أول ورُد المال ......... وإوعىَ يروح عليك النوم

ولازم تبقى راضي البال .... مِسافر والإيدين طاهرين

اخى وعزيزى مسعد النحلة شكرا لك على ما قدمت وكل عام وانت بخير عيد طيب مبارك نطلب من الله ان يعيده علينا جميعا بخير ويمن وبركات

أنا اللي بشكرك أخي الشاعر سليمان محمد شاويش على اهتمامك وتعليقك الجميل
وكل سنه وانت طيب

يا رايح عند بيت الله

يا رايح عند بيت الله :: تعاليق

يا رايح عند بيت الله