حوار بين زوج ثورى وزوجة فلولية ::...

بما أننا فى أيام عيد، وأيام العيد أكل وشرب ولهو مباح، وترويح عن النفس بعد شهر الصوم، فسأترك الساسة والسياسة جانبًا اليوم
وإليكم تلك المساجلة الزوجية أو قولوا "المناقرة الزوجية" بين زوج ثورى وزوجة فلولية،
وأتت المناقرة على وجبة لحمة ضانى بالملوخية
يعنى فى حالة صفا من الكهرباء التى سمحت للمطبخ أن يكون منيرًا
والطبيخ به ملح وليس سكر..

◄◄الزوجة وهى متأففة واليوم عيد قالت: لك الله يا مصر.. مين كان يتصور أننا فى مصر نعيش ساعات الظلام وتقف ثلاجاتنا عن تخزين اللحوم والطعام، وتتوقف مكيفات القادرين ومراوح العاثرين عن العمل بسبب انقطاع الكهرباء، مما يعنى أن شللاً يصيب البيوت فضلاً عن شلل الشوارع والمصالح والمصانع، و"كله كوم وحكاية توقف المترو وحبس الناس فيه بسبب انقطاع التيار كوم ثانى".

◄الزوج وقد أخذه الحماس بعض الشىء للثورة يرد: قصدك إيه يا ست هانم؟

◄◄الزوجة: قصدى والا مش قصدى :: هتفرق إيه معاك يعنى؟

◄الزوج: تفرق ونص، يعنى قصدك أن هذا الذى جنيناه من الثورة؟

◄◄الزوجة: هو دا قصدى ومادمت قلتها يبقى هو دا، إيه إللى أخذناه من الثورة غير وجع القلب وضياع الأمن والاستقرار، وانقطاع الكهرباء والمياه وموت ضمائرالناس وصحوة البلطجية وسطوتهم وعلو صوتهم وتهديدهم الكبير قبل الصغير.

◄الزوج: إيه أنت ماشية على مذهب إلهام شاهين ولا إيه؟ ويا خوفى تكونى "فلولية"؟

◄◄الزوجة: مال إلهام شاهين ومال إللى إحنا فيه بقى؟وبعدين أنا طول عمرى بحب بلدى ولا أنا فلولية ولا أنت ثورى، من أكثر من ربع قرن وإحنا عايشين هدفنا نربى العيال ونعلمهم ونكبرهم ونؤدى رسالتنا فى الحياة، وبعدين فى النهاية موت، فسيبك -الله يخليك- من المصطلحات الغريبة علينا والتصنيفات اللى ضيعتنا وضيعت البلد.

◄الزوج: إلهام شاهين هى إللى بتترحم على أيام مبارك وبتلعن "سلسفين" الأيام إللى إحنا فيها وتستشهد بالواقع المزرى اللى بتعيشه مصر هذه الأيام؟

◄◄الزوجة: اسمع أنا ماليش دعوة لا بإلهام شاهين ولابغيرها أنا لىّ دعوة أن بلدى تكون كما كانت أمن وأمان وسلام.. أخرج اشترى حاجات البيت من فواكه وخضروات ولحوم ودجاج وأسماك وأحطها فى الثلاجة.. وأنا مطمئنة فى أى وقت أطلع أطبخ فى الليل فى النهار وأوازن بين شغلى وشغل بيتى، ولا تخرب منى هذه الأشياء الضرورية بسبب انقطاع التيار، واللى يهمنى أنى أمشى فى الشارع مطمنة لا أحد يتعرض لى ولا يؤذينى فى ليل أو نهار رجعت مع أولادى فى نص الليل اشترينا حاجات العيد واتأخرنا بالليل أرجع وأنا مطمنة مش أموت أنا وأطفالى فى المترو كما ماتت المرأة المسكينة مع طفلتها خنقًا؟

◄الزوج: برضه أنتِ عاوزة تقولى إيه؟

◄◄الزوجة: بصراحة عاوزة أقول وبصراحة: إن القيادة الجديدة مسئولة عن اللى إحنا فيه ومش أنا وحدى اللى بقول كده كتير بيكرروا الكلام دهه ويقولوا "الله يرحم.." بس ومش مكملة.

◄الزوج: يا ستى، مصر الآن كأنها سيارة تعطلت فوق كوبرى ونزل صاحبها يزق فيها حتى يحركها بعيدًا عن طريق المارة، مطلوب من الناس أن تساعده فى دفع السيارة للأمام، لكن أن يقفوا متفرجين عليه وهو يلهث تعبًا وينضح عرقًا وحده فيصبح الأمر فيه خلل أخلاقى، ويزيد هذا الخلل الأخلاقى أكثر إن جاء بعض السفهاء فعاكسوه ودفعوا السيارة للخلف فى الوقت الذى هو يدفع بها بكل قوته للأمام!!

◄◄الزوجة: يعنى مَن المسئول عما نحن فيه؟

◄الزوج: ليس المسئول هو صاحب السيارة التى وقفت منه فجأة فى عرض الطريق، فالمسئول هم الذين يقفون للفرجة ويريدون من صاحب السيارة أن يكون بقوة شمشون الجبار فيرفع السيارة بيد واحدة ويطير بها مثل سوبر مان فى الهواء وينزل من الكوبرى وحده ويفسح الطريق للمارة، والمسئول أيضًا هم الذين يعاكسونه بدفع السيارة عكس الاتجاه بدلاً من الذين يقولون له بكل حب وحنان: "يالله يا أخ على القوة إيدنا فى إيدك.. واللى يحب النبى يدى زوبة زقة.. واللى يحب النبى يزق"..
والكلام الحلو الذى يتميز به أبناء البلد بــ روح أبناء البلد وأخلاق أبناء البلد.. لو فعلنا هذا سوف ينصلح حال البلد ونصبح أحلى بلد وأجمل بلد وأفضل بلد، لأننا طول عمرنا كدا أحلى بلد وأجمل بلد وإلا ماقالوا على بلدنا: "أم الدنيا"؟

◄◄الزوجة – بعد هدوء وشبه اقتناع- تختم الحوار بقولها: اللى يعنينى أن البلد تعمر وتستقر، وفعلاً مطلوب من الناس جميعًا أن يقفوا مع من يقود البلد مهما يكون من هو
نحبه أو نكرهه
نتفق معه أو نختلف معه،
لكن وجب أن نقف معه يدنا فى يده وكتفنا مع كتفه
والله يمدك بالعافية يا مصر يا أم الدنيا..

◄◄آخر كبسولة:
◄بعد هذه المناقرة الزوجية الطويلة اللى تنشف الريق،
منتظرين منى كبسولات ثانية،
لأ ...
كفاية عليكم هذا النكد الزوجى باللحمة والملوخية
وعليكم بعدها أن تحلوا بالمهلبية.
دمتم بحب

حوار بين زوج ثورى وزوجة فلولية ::...

حوار بين زوج ثورى وزوجة فلولية ::... :: تعاليق

حوار بين زوج ثورى وزوجة فلولية ::...