بصوت الخائف المصدوم كان يتحدث علي، أخ المتهم الرئيسي بتنفيذ تفجير
أركانة الإرهابي يوم 28 أبريل الماضي، ل"كود" في أول خروج إعلامي له.

علي ع عبر عن صدمة الأسرة والحي لما وقع، مؤكدا أنه لم يظهر يوما
تطرفه.















عادل يعيد تمثيل الجريمة المتهم بتنفيذها ت كود






"كود" واش خوك
عادل اللي بان فإعادة تمثيل تفجير مراكش هو اللي كتعرفو؟

هاداك هو خويا اللي كنعرفو. دري عادي بزاف، ما عمرو دار العيب ولا بينو.


"كود" كيفاش
كتعيش العائلة بعد ما سمعات لخبار بللي عادل هو اللي نفذ التفجير؟

حنا ماشي غير مصدومين وبزاف، حنا راه مرضنا. خويا اللي صغر مني (ع
من مواليد 1986 وعلي من مواليد 1971) اللي ما كانش كيتكلم بزاف يولي متهم
بتنفيذ تفجير إرهابي إجرامي اللي كنستنكروه وكندينوه.


ولكن التحريات الأولى راها
بينات باللي ع ماشي هادي أول علاقة ليه بالإرهاب، شحال من مرة كان باغي
يمشي للقاعدة يجاهد؟
حنا ما كان كيكول لينا والو على
هاد الشي اللي كنسمعوه أول مرة. كان كيتصطى على برا وباغي يحرك لأوربا،
وحاول أكثر من مرة من ميناء آسفي.
كان كيغبر وقت طويل وباش
يرجع يكول لينا راه كان حارك ورجعوه.

كيفاش كانت علاقتكم بيه؟

كان كيجي يوميا للدار مع الصباح، كان سيد عادي بزاف. عزيز عليه يتفرج
فالكرة من عشاق البارصا.

واش كان متدين من الناس اللي كيحللو ويحرمو فالعائلة؟

كنعرف خويا وراني ما مصدقش هو اللي يدير هاد الكارثة، ما عمرو جبد
لينا لحلال ولا لحرام. هادي خمس شهر تقريبا درنا خطبة لأختي، وكان النشاط
وكثر من هاد الشي عائلة لعريس جابو كاورية معاهم للدار وبرك معاها وما بانش
مضايق ولا مقلق، كان عادي بزاف.

واش هو مزوج؟
كان مع
واحد السيدة وهي اللي طلبت الطلاق منو، وتزوج بوحدة أخرى هادي سبع شهر وهي
حامل فشهرها الثالث.

من نهار اللي تزوج واش بان عليه كيدير شي حاجة ولا كان
مبرزط؟
ما عمرو بان عليه شي حاجة. بقى عادي حتى آخر
نهار شفناه فيه. نهار اللي شفنا داك الشي تصدمنا ومرضنا فالعائلة. هو ما
يديرش هاد الشي المجرمين هما اللي شارجاوه وخلاوه ينقلب. ما كرهتش نعرف هاد
الناس اللي مرضو عائلة. الدرب كامل كيعرفوه باللي ظريف ومزيان.


خوكم مازال متهم
بالتنفيذ ولا تحكم عليه باللي هو مولاها كيفاش غاييين تصرفو؟

حنا كنستنكرو كل عمل كيوسخ سمعة بلادنا. اللي ما فيهش النفس على بلادو ما
يكمكنش تكون فيه النفس على دينو وعروضو. نهار اللي وقع التفجير دعيت على
اللي دارو وكلت والله ما يكونو مسلمين هادو. ونهار يثبت بللي هو مولاها
غادين نتبرؤوا منو، ما هو خونا ما حنا عائلتو.


نهار التفجير رجع من مراكش وجا
عندكم للدار، آش كال ليكم عليه؟
جبدنا التفجير فالهدرة
وباقي عاقل باللي كالو لي، كال لي "حشومة هاد الشي اللي دار، ما كانش خاصو
يوقع، وزاد "اللهم إن هذا منكر".