هذه قصيدة لأحمد فؤاد نجم

طاطي

طاطي راسك طاطي طاطي
انت ف وطن ديمقراطي
انت بتنعم بالحرية
بس بشرط تكون مطاطي

لما تكون شغال بذمة
خايف على مصلحة الأمة
شغلك يطلع من غير لازمة
علشان مبيعلاش غير واطي
طاطي راسك طاطي طاطي
انت ف وطن ديمقراطي

لما حاميها يكون حراميها
وبلاده ورا ضهره راميها
طالع نازل واكل فيها
مسنود بالبدلة الظباطي
طاطي راسك طاطي طاطي
انت ف وطن ديمقراطي

لما شقاك يصبح مش ليك
فقرك سد السكة عليك
تتلفّت تلقى حواليك
إما حرامي و إما عقاطي
طاطي راسك طاطي طاطي
انت ف وطن ديمقراطي

لماتلاقي بلاد الدنيا
فيها البني آدم حاجة تانية
وانت في الطبقات الدنيا
قرد مسلسل أو وطواطي
طاطي راسك طاطي طاطي
انت ف وطن ديمقراطي

لما الجهلة يبقوا أمامك
أو فوقك ماسكين ف زمامك
ويسوقك ع الهلكة إمامك
تشرب م السم السقراطي
طاطي راسك طاطي طاطي
انت ف وطن ديمقراطي


لما الكلمة تكون بتدينك
لما تخبي ف قلبك دينك
لما الذل أشوفه ف عينك
هات إحباطك على إحباطي
طاطي راسك طاطي طاطي
انت ف وطن ديمقراطي
انت ف وطن ديمقراطي

-------------------------------------

ارقص على السلم
عبد الرحمن الابنودى
---------------------------

سلم قلوعك للغروب..والغربه..
واعجن..وكل واشرب بقية زادك..
ولا انت واصل بالقلوع..لأوروبا..
ولا انت راجع بالقلوع..لبلادك..

فيا شاب..
يا معلم ..يا متعلم..
ارقص على السلم..
يا صهد..يا شاوح..
ضلل على الرايح..
في اليم..من غير يم..
الجفن من غير عين..
والزند من غير دم..


وياشاب يا مطفي العيون الماس..
راح الحماس..وقعدت في الضله..
كشفت نفسك في البلاد للناس..
وتاجرت في الاشعار وفي الفعلا..
لا دين ..
ولا مله..
لا وصلت..لا رجعت..لا منور ..ولا مضلم..
الحق قام..
والكره قام..
لا قمت تتكلم ..ولا تسلم..
فارقص..
-------------------------
إمام المخبرين
لاحمد مطر
تهت عن بيت صديقى
فسألت العابرين
قيل لى امشى يسارا فسترى خلفك بعض المخبرين
حد لدى أولهم سوف تلاقى مخبرا يعمل فى نصب كمين
أتجه للمخبر البادى أمام المخبر الكامن و أحسب سبعة
ثم توقف تجد البيت وراء المخبر الثامن فى أقصى اليمين

.............................................
بيان بدء الربيع
احمد فؤاد حداد

بيان بدء الربيع


على مستواك يا نظر
يافطة تسد القمر
إعلان لفيلم جديد
"عودة رعاة البقر"

عودة بريطانيا تاني
في الشكل الأمريكاني
صوت النشرة الكئيبة
يقطع كل الأغاني

التكنولوجيا التمام
تكنيك فشر فيتنام
تفوق حرب الكواكب
راحت على الألغام

كل البلاد بتشارك
أضخم إنتاج معارك
ولا شيء يقف قصاده
لا رقابة ولا جمارك

أمريكا طالعة تذيع
بيان بدء الربيع
تصبح على خير يا عالم
سنة سودة على الجميع

الحرب جاية جاية
إن شالله بقيصرية
ده قصف أمريكاني
يعني أكبر هدية

بغداد أيا بغداد
حِمل الكآبة زاد
ومعايا بعد الله
أشعار فؤاد حداد

أنا مش خايف نهايتي
مستني الوقت يأتي
فن الإجرام هوايته
والموت أصبح هوايتي

------------------------------

أحمد فؤاد نجم
بيان هام

هنا شقلبان

محطة اذاعة حلاوة زمان

من القاهرة ومن كردفان

وسائر بلاد العرب واليابان

ومن فنزويلا أيضا ايران

ومن اى دار

أو بلد مستباحه

بفعل السياحه مع الأمريكان

هنا شقلبان

محطة اذاعة حلاوة زمان

نقدم اليكم بكل اللغات

مراسح وسيما وجميع الفنون

صحافه ومنابر وتلفزويونات

وخطبا ف جوامع وجبنه وزيتون

ونقزح ونركب جميع الموجات

ونبحث ونفهم فى كل الشئون

ودايما نلعلع فى كل الحالات

ولا حد سامع ولا يحزنون

وتسمع ما تسمع دا ما يهمناش

لأن احنا اصلا بناكل بلاش

فخليك فى نفسك وما تخليناش

نسلط عليك القلم واللسان

هنا شقلبان

محطة اذاعة حلاوة زمان

يسر الذاعه ولا يسركوش

بهذى المناسبه ولا بندعيكوش

نقدم اليكم شحاته المعسل

وبدون الرتوش

شبندر سماسرة بلاد العمار

معمر جراسن للعب القمار

وخارب مزارع و تاجر خضار

وعقبال أملتك أمير الجيوش

ما تقدرش تنكر

تقول ما اعرفوش

ما تقدرش ايضا تفول ما أسمعوش

شحاته المعسل حبيب القلوب

يزيل البقع ولاهموم والكروب

يأنفس يأفين يبلبع حبوب

ويفضل يهلفط ولا تفهموش

وتفهم ما تفهم دا ما يهمناش

لأن انت فاهم وعامل طناش

ح تنكر وتحلف ح اقول لك بلاش

ح تتعب دماغنا وتتعب كمان

هنا شقلبان

محطة اذاعة حلاوة زمان

لأن المخبى ظهر واستبان

وكل المسائل بدت للعيان

وطلعت حكاوى ونزلت كمان

عن التهريبه وعن كيت وكان

وعن محسوبيه وعن ألعبان ( بضم الالف)

ظهر فى المدينه كأن الطوفان

وغرق مراكب وسوح غيطان

وبعض المراكب ح تغرق كمان

وأزمة مساكن وأزمة أمان

وعالم بياكل فى عالم جعان

وريحة مؤمره فى جو المكان

مخطط خيانه مع الأمريكان

لدبح العشيره وحرق المكان

وفيه ناس بترغى ولازم بيان

كما ابلغونا جميع الودان

لهذا وذاكا وتلكم كمان

نقدم اليكم عروسه وحصان

شحاته المعسل وهذا البيان

هنا شقلبان

محطة اذاعة حلاوة زمان