هلأ السيد حشيش سوري ما بيجوهر الا بعد سيجارة حشيش. اما حضرتي فما بتجود معي القريحة الا بعد شي كاستين ويسكي اسكتلندي.

من اول الثورة وكل ما بافتح تمي بينطلي كام
منحبكجي ومنحبكجية وبيقولولي انتي شو بيعرفك انتي مو عايشة بسوريا. وكانه
يعني عم يقولولي شو كتر غلبتك روحي العبي بعيد. هلأ انا متجوزة واحد
امريكي كتير حباب وبيحب سوريا ( بس ما باسمحله بالتدخل بالشؤون الداخلية
لبلدي لانه اذا حكى شي كلمة بيقولوا مؤامرة خارجية) بس الله وكيلكم من وقت
ما بدت الثورة وشفت اول كام شهيد بدرعا ودموعي صارت تنزل شلالات. وانقلب
البيت لجحيم لا ليلنا ليل ولانهارنا نهار. لاعندي قنوات عربية ولاحتى
منشوف تلفزيون. بقى مالي غير هالنت ومن موقع لموقع. والسيد جوزي ( الله
يخليلكم يللي عندكم ويفرحنا بالعزابية ) شايفني ليل نهار زعلانة وبيفوت
على موقع الثورة وبيتفرج بس بما انه مابيعرف عربي( ولالي ناوية علمه)
بيشوف بس ما بيفهم تمام شو عم يصير, وبيعرف ( لاني فهمته) انه نحنا
السوريين ما منقبل اي تدخل من الولايات المتحدة الامريكية. صار عنده يمكن
رد فعل من نوع غريب ( وطولوا بالكم عالشرح لانه بدي اوصل لنقاط مهمة مع
سوء التشبيه) .هاد جوزي تبنى الدفاع عن قتل المخلوقات الاخرى والتعاطف
معهم.
يللي عاجبني باسلوبه انه مبني على استراتيجية واضحة بتنقسم لقسمين: اولا
اظهار الوحشية يللي عم يتعرضولها هالمخلوقات بتكرار يومي يعني كل يوم
بينشر قد مابيقدر مقاطع عن الوحشية بالقتل ( وهاد شي عم يصير مع الثورة)
وتقديم البديل عن هالوضع ( وهاد شي لسه الثورة ما قدرت تعمله). يعني يللي
بدي قوله انه الثورة ممتازة بالاداء الاعلامي اليومي بس لسه ما قدرت تقدم
تصور لشو بده يكون الحال بسوريا بدون بشار وجماعته.
رح اشرح اكتر لانه على سكر الواحد بيضوع. اذا انت عم تقللي انك آخدني على
محل ماباعرفه ولا بحياتي رحتلله, شلون بدك ياني امشي معك بدون ماتورجيني
صورة او تشرحلي كيف بدي عيش بهالجنة الموعودة.
انا برايي الشباب لازم يقدموا شرح تفصيلي لتصورهم لمستقبل سوريا الحرة
الديمقراطية. يعني اذا بيقولوا للناس انشاالله وقت مننتصر وبتتحرر سوريا
مالك رح تدفع رشوة لتمشي معاملة ويللي بيطلب رشوة رح ينحبس وتاخد حقك
كامل. و لا رح يسترجي شرطي سير يوقفك اذا ما كنت مخالف ولما بيوقفك بيكون
الكاميرا عم تصوره هو وعم يتعامل معك واذا بيقلل احترام او بيبتزك رح
يتسرح. او اذا بيقولوا انه رح نساوي مشاريع تنموية للريف ونحافظ على
التشكيلة المجتمعية ونوطد عمل ومشاركة المجتمعات المحلية بتنمية مناطقهم.
وانه اذا الك قضية بالمحكمة والقاضي جرب يبتزك رح نحبس القاضي ونجبلك حقك.
او اي شي تاني رح يكون تطمين للناس. لازم لهالثورة يكون في رؤيا واضحة
لمستقبل سوريا بعد بشار والشلة تبعه.
اسمعوا مني قولولهم عني. وهاد انه مو عم اتنقل من الاميركان بس يعني والله في شي كام سنة حضارة بيننا وبينهم.
وعذرا من حشيش سوري. بدنا كتير ليكون عنا نقاء بصيرتك.