اللهم ارحم المندسين و المندسات, و انصر عبادك المندسين في
كل مكان على وجه هذه الكرة الارضية و المريخية في اليمن و سوريا و العراق
و افغانستان و في كل مكان تحية طيبة و بعد, بداية بدي احكي عالدول العميلة
المخربة و يلي حاملة عمليات تخريب و اندساس لسوريا من مثل تركياستان و
امريكاستان و فرنسستان و و يو ك ستان و الدول الصديقة متل روسيا ستان و
صينا ستان و كل هالشلة اشة لفة انو خلينا نفكر شوي اكيد هنن مو فاتحين
بلادهن جمعيات خيرية ولا عم بدافعوا شوي بشكل بسيط عن يلي بسموا حقوق
الانسان او الاجرام والمسلحين و انو مافي دولة بتسكت عتمرد مسلح و
يعلقوا عيلي عم بصير بسوريا و باقي الدول هيك لوجه الله تعالى اكيد قلهن
مصالح و بدهن يوقفوا مع الشعوب او المجرمين لأنو بكرا بيعرفوا هنن اكتر
الناس انو الشعب يلي رح ينتصر (او منهن بيتجاهل و بيتفائل بطريقتوا
المقلوبة و بيفهم انو الاجرام رح ينتصر) و يشيل هالظالم و يرمي بمزبلة
التاريخ و بيعرفوا انو اذا وقفوا مع هالظالم رح ينكبوا من قبل هالشعب
بمزبلة التاريخ ( او بيعرفوا انو لو وقفوا مع الشعب رح ينكبوا من قبل
النظام بالطرية المعكوسة) كمان, مشان هيك عم ياخدوا مواقف مع الشعوب و لو
بنسبة ضعيفة و لسا خايفيين ليكو السيد ابو حسين ما رفع الغطاء
لهلأ عن سيادة المجرم صديقوا و السيد ساركوزون و ما بعرف التانين قالوا
ببيان تبعن انو النظام يقترب من ارتكاب جرائم ضد الانسانية يعني كل هالشي
و 1300 قتيل و أطفال و تعذيب و لسا ما صار مجازر ضد الانسانية ايه ما بعرف
امتى بدو يصير ضروري يصير عنا 10000 قتيل مشان نصير ليبيا و يقولوا جرائم
ضد الانسانية و سيدي الشعب مو سألان عنهن كلهن لأنو ان حكو او لاء بدنا
نشيلو و نتحرر ولا واحد من سيادتهن رح يقرر شو و كيف الاصلاحات الشعب له
القرار الاخير و الوحيد و شي اهانة اكتر انو السيد المجرم عنا بياخذ
اوامروا من دول مجاورة و بيستمع لنصائحها المفيدة و كأنو
نحن يعني الشعب ما دخلنا بالقصة نحن برا و المشكلة بين حضرت سيادة المجرم
و بين زعماء الدول التانية يا حبيبي انت الرئيس يلي كنت بزمناتك بتسمى
رئيس, موظف عند الشعب افهمها يعني اذا الشعب ما عجبوا ادائك بقلعك فهمت
بقلعك و بحط حدا غيرك يعني ماشي كتر خير الدول يلي عم تستقبل ال ن ا ز ح
السوري و بتقطع التمويل عن المجرم و منحترم موقفك بس مو انتي يا دولة يلي
بتقرري شو سوريا و مين البديل الشعب ادئها و اكتر و حياتكن و بدي من شعبنا
يتزاكا شوي لهدول الناس يلي ركدوا بسرعة حطولي صور اشخاص كصور شخصية قلهن
يعني الله يعطيك العافية ليلي ساعدنا و وقف معنا
بس مو تجي تركبنا او يا شعبي لا تخلي يركبنا انت لأنو يا فرعون مين فرعنك
قلن ما لقيت حدا يردني او ايام الشعب بفرعني نحن ثورتنا للحرية نحن دعاة
حرية بكل محل بالكرة الارضية بفلسطين بسوريا بجزر القمر نحن مع الحرية هلأ
ايه نحن منكون مصلحجيين شوي و بدنا مساعدةووقوف دول تانية معنا انو يقطعوا
التمويل عهالننظام و المجرم مشان ما يساعدوا يدبحنا بس و نحن لا تخافوا قد
السيرة و بنشيلوا لحالنا بس لا تدعموا و من الواضح انو لسا كتير دول من
بينهن عمو ابو حسين ما رفع الغطاء عنو منقلك يا عمو شيل الغطا عنو بس ما
بدنا شي منك غير هاد لأنو بفترة الثبات
العميق يلي كنا نايميين في كان الرئيس عنا يستمد شرعيته من دول برا بس هلأ
بدنا نغير و تصير شرعية الرئيس و النظام من الشعب و رسالتنا انو يا من
تدعون نفسكم دول العالم الأول بس سحبوا غطائكن عن المجرم و الا بعدين ما
رح يعجبوا هالشي لشعبنا و مافي مصالح معنا بعدين بس انتوا اذكى من هيك رح
تساوها بس لسا في منكن خايففين و مو واثقين بالشعب 100% و بقلكن لا
تخاوفوا حطو رجليكن و ايديكن بمي بارده
اليوم فاجئتني شغلة انو طلع واحد من الفوفوزلات الجداد عالساحة لأنو
من كتر عددهن و من كتر ما بيشبهوا بعض ما عدت حفظتن لأنو شي بملل المهم
بلا طول سيرة انو الفوفوزيلا تبع اليوم حكا و قال: الرئيس السوري لا يأخذ
اوامره من عمو ابو حسين ولا من زعيم اخر (يعني بالله لكن صرلو 11 سنة مو
عم ياخد اوامروا من هنيك و من عمو احمدي و من غيرهن ) المهم و قال الدولة
ذات سيادة و عنا مسؤولين و ناس بتفهم( مع اني بشك بالنقطة هي ناس
بتفهمم!!) لتأخذ قرارات للبلد ردنا عالشي نحن المندسيين انو يا فوفوزيلا
رئيسك و صحابوا طول حياتن بياخدو اوامرهن من برا و نحن نرفض انو
برا يعلمنا الحرية لك نحن بنعلم الحرية لبرا كلها و سؤلوا مين سعد الله
الجابري و فارس الخوري و و و و تطول اللائحة بالاخير انو نحن الاثنين
اتفقنا انو مو هدنك يلي برا بيقولولنا شو نساوي و ناخذ قرارات منهن بس
واحد بقولها بس متل فشار السفاح قول بلا فعل بضل بياخذ قراراتو من برا اذا
مو من ابو حسين من عمو احمدي و بوتين و هيجينتاو بس المندسين ما سألانين
عن حدا قلهن سيادة و استقلالية و بيفهموا بالمصالح و سياسيين بيفهموا
يحسنوا دولتهم و منكون نحن يلي منعطي اوامر لغيرنا مو منتلقاها
متل ما كتير قالوا الشعب السوري بوزع مفكرين عالعالم العربي كلو بقا راح زمن الذل حلكن تفهموها